Sangli News: बंद चारचाकी गाडीत सापडला मृतदेह, पोलिस तपास सुरु
Sangli News: आटपाडी, ५ जून: आटपाडी शहरातील संत सावता माळी महाराज मठाच्या पाठीमागे उभ्या असलेल्या एका बंद चारचाकी गाडीत बुधवारी दुपारी ११.३० वाजता अंदाजे ३५ ते ४० वर्षाच्या पुरुषाचा मृतदेह आढळल्याने परिसरात खळबळ उडाली आहे. मृतदेहाची ओळख पटवण्यासाठी आणि मृत्यूची नेमकी कारणे शोधण्यासाठी पोलिस तपास सुरु आहे.
गाडी क्रमांक एमएच ९ बीएम ७३६३ मागील एक वर्षापासून बंद अवस्थेत मठाच्या पाठीमागे उभी होती. परिसरातील लहान मुले खेळत असताना गाडीमधून दुर्गंधी येत असल्याचे त्यांच्या लक्षात आले. त्यांनी तात्काळ ही माहिती अमित फडतरे यांना दिली. अमित फडतरे यांनी गाडीचे दरवाजे उघडून पाहिल्यानंतर त्यांना आतमध्ये सडलेल्या अवस्थेत एक पुरुषाचा मृतदेह आढळला.
मृतदेहाच्या उग्र वासामुळे आसपासच्या लोकांनी जवळ जाण्याचे धाडस केले नाही. अमित फडतरे यांनी तत्काळ पोलिसांना घटनेची माहिती दिली. पोलिसांनी घटनास्थळी येऊन पंचनामा केला आणि मृतदेहाची ओळख पटवण्याचे काम सुरु केले आहे.
आता या घटनेमुळे संपूर्ण परिसरात भीतीचे वातावरण निर्माण झाले आहे. मृत्यूचे नेमके कारण अजूनही अस्पष्ट आहे आणि पोलिस तपास करीत आहेत. या प्रकरणाबद्दल अधिक माहिती मिळाल्यानंतरच या दुर्दैवी घटनेचे गूढ उकलले जाईल.
लोकांनी अशा संदिग्ध घटनांची तात्काळ माहिती पोलिसांना देणे आवश्यक आहे, असे आवाहन पोलिसांनी केले आहे. आटपाडीतील रहिवाशांनी आपापल्या परिसरातील अशा प्रकारच्या बंद आणि संदिग्ध वाहनांची चौकशी करणे गरजेचे आहे, जेणेकरून भविष्यात अशा दुर्घटना टाळता येतील.
आणखी पाहा:ठाण्यात 17 लाखाचे दागिने जप्त, घरफोडी करणाऱ्या तरुणाला अटक ||Thane Thief News
