Tuljapur News: बापरे… पत्नी जीवावर उठली, आमरसातून दिल्या झोपेच्या गोळ्या; नवरा आणि सासरच्यांना मारण्याचा कट?
Tuljapur News: आंबा किंवा आमरस हा बहुतांश लोकांचा वीक पॉईंट. असह्य होणारा उन्हाळा, लोकांना आवडण्याचं एकमेव कारण म्हणजे आंबे. पण हाच आमरस कोणाच्या जीवासाठी घातक ठरला तर? तुळजापूर तालुक्यातील नांदगाव येथे घडलेल्या एका घटनेने साऱ्यांना हादरवून सोडलं आहे. एका महिलेने तिच्या पतीला आमरसामध्ये गुंगीच्या गोळ्या घालून दिल्याचा धक्कादायक प्रकार समोर आला आहे.
नेमकं काय घडलं?
फिर्यादी महेशकुमार चिनगुंडे, हे तुळजापूर तालुक्यातील नांदगाव येथे राहतात. 24 मे रोजी संध्याकाळच्या जेवणासाठी त्यांची पत्नी भाग्यवती यांनी त्यांना आमरस दिला. मात्र, या आमरसामध्ये भाग्यवती यांनी गुंगी येणाऱ्या, झोपेच्या गोळ्या टाकल्या होत्या. या गोळ्यांचे सेवन केल्याने महेशकुमार यांच्या जीवाला धोका पोहोचू शकतो, हे माहीत असतानादेखील भाग्यवती यांनी कोणत्याही डॉक्टरचा सल्ला न घेता किंवा डॉक्टरच्या परवानगीशिवाय त्या गोळ्या टाकल्या.
घरातील इतरांनाही धोका
हा आमरस महेशकुमार यांच्यासह त्यांच्या घरातील इतर सदस्यांनीही खाल्ला, ज्यामुळे सर्वांनाच गुंगी चढली. परिणामी, ते दुसऱ्या दिवशी सकाळी उशिरापर्यंत झोपले होते. झोपेतून उठल्यानंतरही त्यांच्या शरीरात वेदना जाणवत होत्या. यामुळे चिंताग्रस्त महेशकुमार यांनी त्यांच्या पत्नीविरुद्ध नळदुर्ग पोलीस ठाण्यात तक्रार दाखल केली.
पोलिसांचा कसून तपास
महेशकुमार चिनगुंडे यांनी तक्रार दिल्यानंतर, भाग्यवती चिनगुंडे यांच्याविरुद्ध कलम 328 नुसार गुन्हा दाखल करण्यात आला आहे. भाग्यवती यांनी आमरसात झोपेच्या गोळ्या का टाकल्या? पतीला आणि सासरच्या लोकांना हा रस का खायला दिला? त्यांच्या या कृत्यामागे नेमका हेतू काय होता? याचा पोलिस कसून तपास करत आहेत.
संभाव्य उद्देशाचा शोध
पोलिसांनी या प्रकरणाचा तपास सुरू केला असून, भाग्यवतीच्या कृत्यामागील नेमका उद्देश शोधण्याचा प्रयत्न सुरू आहे. पती महेशकुमार यांच्या जीवाला धोका पोहोचवण्याचा प्रयत्न हा पूर्वनियोजित होता की काही दुसरे कारण आहे, हे शोधणे पोलिसांसाठी महत्त्वाचे आहे.
हे प्रकरण सामाजिक चर्चेत
या घटनेने संपूर्ण गावात खळबळ माजवली आहे. लोकांमध्ये चर्चेचा विषय बनलेल्या या घटनेने पती-पत्नीच्या नात्यातील विश्वासाला धक्का दिला आहे. पुढील तपासाअंती या प्रकरणाची खरी कारणे उघड होतील, अशी अपेक्षा आहे.
सावध रहा! कधी कधी आवडती वस्तूही घातक ठरू शकते.
